Accueil | Table | Citations | Bio | Sites préférés | Contact | Galerie | Articles | Partitions | Crédits

Baltasar Castiglione
Le Parfait Courtisan, du comte Baltasar Castillonois.
Traduit par G. Chapuis, Tourangeau, 1585

Livre premier

  Voyez la musique, dont l'harmonie est ores grave & tardifve, ores tres-hastive  & de nouvelles manieres : & neantmoins toutes delectent, mais pour diverses  causes, comme l'on comprend en la manière de chanter de Bidon [Antonius Colebault, chanteur de la  Chapelle du pape Léon X], laquelle est tant artificielle, pronte, vehemente,esmeüe  & de melodies tant differentes, que les esprits de celuy qui l'entend sont  tous esmeuz & s'enflamment, & en demourans ainsi ravis semblent s'eslever  jusques au ciel. 

  Notre Marqueto Cara, en sa manière de chanter n'esmeut pas moins, mais c'est  avec une harmonie plus molle & plus douce, laquelle par une voye paisible &  plaine d'une piteuse douceur, attendrit & penetre les coeurs imprimant d'une douce manière en iceux une passion delectable.

Cangia spera de Marchetto Cara ; Ensemble Doulce Mémoire.

  Messieurs, vous devez sçavoir, que je ne me contente pas du Courtisan s'il  n'est musicien, & outre l'intelligence & asseurance de sa partie sus le livre, s'il ne sçait encore jouer de divers instrumens : car si nous y pensons bien, on ne sçauroit trouver aucun repos de la peine & medecine des esprits malades  & lassez qui soit plus louable & honeste, en temps de loisir, que cette cy : &  principallement és Courts, esquelles outre le soulas & relasche des ennuys que  la musique donne à chacun, se font beaucoup de choses pour contenter les dames, desquelles les coeurs tendres & delicats sont facilement penetrez par l'harmonie & rempliz de douceur. 

  Et pourtant ne vueillez priver nostre Courtisan de la musique, laquelle non-seulement adoucit les courages humains, lmais souvent fait apprivoiser les bestes sauvages, de manière que celuy qui n'y prend goust, se peut tenir asseuré qu'il a les esprits discordans l'un d'avec l'autre. Nous la voyons estre employée es sacrez temples à rendre louange a graces à  Dieu, & est à croire qu'elle luy est agréable, & qu'il la nous donnée pour un tresdoux alegement de nos travaux & fascheries. 

  Et pour ceste cause bien souvent les robustes laboureurs, souz l'ardent Soleil deçoivent leurs ennuis avec leur chalumeau & chant rustique. La paisane mal parée, qui se lève devant le jour pour filer ou tistre [tisser], par ce moyen se garde de dormir & rend sa paine plaisante. 

  C'est le joyeux passetemps des miserables mariniers, après les pluyes, vents &  tempestes. 

  Par ce moyen se confortent les voyagers recreuz & lasses de leurs ennuyeux & longs voyages, & souvent les pauvres prisonniers qui sont aux ceps & à la cadene. 

  Ainsi pour monstrer que le chant, encores qu'il soit gobier resjouit & recree l'esprit, lassé & ennuyé de la peine, il semble que nature l'ait enseigné aux  nourrices pour remede principal du pleur continuel des enfans, lesquels au son de la voix sont induits au repos & paisible sommeil, oublians les larmes à eux tant propres, & à nous données en cest aage, pour nous servir de presage du demourant de nostre vie.

Livre second

  Il ya plusieurs sortes de musique, dist alors le seigneur Gaspar Palevoisin, tant de voix vive, comme des instrumens : & pour ceste cause seroy-je bien aise d'entendre quelle est la meilleure de toutes, & en quelle saison le Courtisan en doit user. 

  Il me semble, respondit le seigneur Frederic, que c'est une belle musique, sçavoir chanter asseurément & d'une belle manière sa partie, au livre, mais me semble encores plus beau sçavoir chanter sur la viole, pour ce que toute la douceur consiste quasi en une seule chose, de manière que l'on note & entend l'air & la bonne grace, beaucoup plus attentivement, quand les aureilles ne sont empeschees qu'à une seule voix : voire meme peut on mieux discerner la moindre faute qui se fait : ce qui n'advient pas quand on chante en compagnie, pource que l'un aide à l'autre. 

    Mais sur tout me semble une chose fort agreable de chanter pour plaisir sur la viole : ce qui donne tant de grace & efficace aux parolles que c'est grande merveille. 

  Tous les instrumens de bouche sont pareillement harmonieux, parce qu'ils ont les consonantes fort parfaites, & qu'aisément l'on y peut faire maintes choses qui remplissent l'esprit de la douceur de la musique. 

  La musique des quatre violes, avec l'archet, ne delecte pas moins, laquelle est tres gracieuse & artificielle. 

Madonna qual certezza de Philippe Verdelot, 1536 ; Ensemble Walsingham

  La vois humaine donne grace & ornement à tous ces instrumens musicaux, desquels je veux que nostre Courtisan se contente avoir cognoissance : ce neantmoins plus il sera excellent en iceux, tant mieux sera pour luy,mais qu'il ne s'empesche de ceux que Minerve & Alcibiade rejeterent, pource qu'ils semblent estre fascheux.   

  Quant au temps & saison de pouvoir user de ces manières de musique, je pense que ce doit estre toutes les fois que l'homme se trouve en une familière & amiable compagnie, & qu'il n'y a point d'autres affaires : mais sur tout cela est seant devant les dames, pource que leurs visages adoucissent les coeurs des escoutans, tellement que la douceur de la musique les penetre mieux, & resveillent aussi les esprits de ceux qui chantent la musique.