Accueil | Table | Citations | Bio | Sites préférés | Contact | Galerie | Articles | Partitions | Crédits

Mellin de Saint-Gelais
Ms B.N. fr 878 (v. 1540)

SUR UN LUTH

O luth, plus estimé présent
Que chose que j'aye à présent,
Luth, de l'honneste lieu venu
Où mon coeur est pris et tenu,
Luth qui responds à mes pensées,
Si tost qu'elles sont commencées
Luth, que j'ay faict assez de nuictz
Juge et tesmoin de mes ennuys,
Ne pouvant voir auprès de moy
Celle qui t'eust auprès de soy,
Je te supply, fay moy entendre
Comme, touchant à la main tendre,
Ton bois s'est guarenty du feu
Qui si bien esprendre m'a sceu
Et s'il se pourroit bien esteindre
Par souvent chanter et me plaindre.
Que pleust à Dieu, Luth, que ta voix
Peust aller où du coeur je vois,
Tant que mon tourment bien ouy
En peut rapporter un ouy.
Lors tu me ferois plus de grace
Qu'onc n'en feit la Harpe de Thrace
Qui faisoit les montagnes suivre,
Car tu ferois un mort revivre.

 Fantasia 32 de Francesco da Milano ; Massimo Lonardi, luth.

SUR UNE GUITERNE ESPAIGNOLE
rompue puis faicte r'habiller par Monseigneur d'Orléans, estant mallade.

Si je suis un peu casse et sourde,
Ce n'est poinct pour ma table lourde,
Bien que celle que j'euz première
Fust meilleure et d'autre manière,
Mais c'est que quand je vins à estre
Donnée à Monseigneur et Maistre,
J'euz tel dueil de sa malladie
Que perdis son et melodie,
Et fuyant tout chant delectable,
Fendis ma resonante table.
Lors luy, se sentant amender,
Voulut ma santécommander
Qui telle n'est que l'ancienne
Mais va croissant comme la sienne.
Guerissez donc tost, guerissez,
Seigneur, qui tant me cherissez.
Que pleut à Dieu qu'en lieu de moy
Vous tinssiez un Sceptre de Roy.
J'entendz que par vous fust tenue
La Terre dont je suis venue.